بیجنگ: وزیراعظم اور عالمی بینک کی سی ای او کے درمیان ملاقات

بیجنگ: (پاکستان فوکس آن لائن) وزیراعظم عمران خان اور عالمی بینک کی سی ای او کے درمیان ملاقات ہوئی، دونوں میں ملاقات بیلٹ اینڈ روڈ فورم کے موقع پر ہوئی۔ مشیر خزانہ حفیظ شیخ، مشیر تجارت عبدالرزاق داؤد اور وزیر خارجہ شاہ محمود بھی ہمراہ تھے۔قبل ازیں وزیراعظم عمران خان نے بیلٹ اینڈ روڈ فورم میں ترقی کیلئے پانچ تجاویز پیش کیں۔ خطاب کے دوران روڈ اینڈ بیلٹ منصوبے کے ثمرات عوام تک پہنچانے کیلیے وزیراعظم نے 5 نکات پیش کئے۔ انہوں نے کہا موسمیاتی تبدیلیوں کے اثرات کو کم کرنے کیلیے مشترکہ کوششیں کی جانی چاہئے، ہمیں سیاحت کے فروغ کے لیے کام کرنا چاہئے، کرپشن اور وائٹ کالر کرائم پر قابو پانے کے لیے مشترکہ حکمت عملی سے کام کرنا ہوگا، غربت کے خاتمے کے لیے فنڈ قائم کیا جائے اور پانچویں تجویز یہ ہے کہ پرائیویٹ سیکٹر، تجارت اور سرمایہ کاری کیلیے ماحول بہتر بنانے کی کوششیں کی جائیں۔

وزیراعظم نے کہا چین کے تعاون سے گوادر تیزی سے دنیا کا تجارتی مرکز بن رہا ہے۔ انہوں نے تقریب کے تمام شرکاء کو پاکستان میں سرمایہ کاری کی دعوت بھی دی اور کہا پاکستان خطے میں امن و استحکام کیلئے بھرپور کوششیں کر رہا ہے، پُر امن اور ترقی یافتہ دنیا کیلیے ہماری کوششیں جاری ہیں۔عمران خان نے کہا پاکستان اپنے لوگوں کے بہتر مستقبل کے لیے باہمی احترام اور مساوی مواقع کے ساتھ چین اور بی او آر کے دوسرے اتحادیوں کے ساتھ مل کر کام کرتا رہے گا، پاکستان ان سب کے ساتھ ہے جو ترقی یافتہ اور پر امن دنیا کا خواب رکھتے ہیں ہم سب پرامید اور خوشیوں سے بھرے مستقبل کے لیے مل کر کام کریں گے۔

Leave a Reply

Your email address will not be published. Required fields are marked *