پاکستان اور چین کے درمیان ریلوے کے معاہدے ’’ایم ایل ون‘‘ پر دستخط

بیجنگ: (پاکستان فوکس آن لائن)پاکستان اور چین کے درمیان ریلوے کے معاہدے ایم ایل ون پر دستخط ہو گئے۔وزیراعظم عمران خان اور چین کے وزیر اعظم لی کی چیانگ کی موجودگی میں وزیر ریلوے شیخ رشید احمد اور چینی وزیر ریلوے نے ایم ایل ون معاہدے پر دستخط کیے۔ اس موقع پر وزیر ریلوے شیخ رشید احمد نے کہا کہ آج پاکستان میں ریلوے کی تاریخ کا بڑا دن ہے۔ ایم ایل ون منصوبے کے تحت پشاور سے کراچی تک ڈبل ٹریک بنایا جائے گا جب کہ نئے ٹریک پر ٹرین کی اسپیڈ کم از کم 160 کلومیٹر فی گھنٹہ کی رفتار ہو گی۔
انہوں نے کہا کہ 13 سال پہلے میں نے ہی اس منصوبے کی فیزیبلیٹی رپورٹ پر دستخط کیے تھے۔واضح رہے کہ وزیر ریلوے شیخ رشید احمد چین کے 4 روزہ دورے پر وزیر اعظم عمران خان کے ہمراہ ہیں۔دورہ چین کے دوران وزیر اعظم عمران خان کی چینی صدر شی جن پنگ اور وزیر اعظم لی کی چیانگ سے ملاقات ہوئی۔وزیر اعظم عمران خان کی چینی صدر اور وزیر اعظم سے بیجنگ میں الگ الگ ملاقاتیں ہوئیں۔ جس میں پاکستانی وفد کے ارکان بھی شریک تھے۔ ملاقاتوں میں دونوں ملکوں کے درمیان سیاحت کو فروغ دینے اور تجارتی سرگرمیاں بڑھانے پر بات چیت کی گئی۔بیجنگ کے عظیم عوامی ہال میں چین کے صدر شی جن پنگ نے پاکستانی وزیر اعظم کا استقبال کیا۔ پاکستانی وفد میں وزیر خارجہ شاہ محمود قریشی، مشیر خزانہ حفیظ شیخ، وفاقی وزیر فیصل واوڈا اور خسرو بختیار بھی شامل تھے۔ پاکستان اور چین کے درمیان وفود کی سطح پر بات چیت ہوئی۔

Leave a Reply

Your email address will not be published. Required fields are marked *