منی لانڈرنگ کیس: زرداری، فریال تالپور سمیت تمام ملزمان پر فرد جرم عائد کرنیکا فیصلہ

عدالت نے پارک لین اور میگا منی لانڈرنگ ضمنی ریفرنسز کی سماعت 22 جنوری تک ملتوی کر دی

اسلام آباد: (پاکستان فوکس آن لائن) احتساب عدالت نے میگا منی لانڈرنگ اور پارک لین ریفرنسز میں آصف علی زرداری اور فریال تالپور سمیت دیگر ملزمان پر فرد جرم کے لیے 22 جنوری کی تاریخ مقرر کر دی۔ عدالت نے تمام ملزمان کو نوٹس جاری کر دیئے۔ احتساب عدالت اسلام آباد کے جج اعظم خان نے میگا منی لانڈرنگ اور پارک لین ریفرنسز کی سماعت کی۔ سابق صدر کی ہمشیرہ فریال تالپور عدالت کے روبرو پیش ہوئیں۔ دوران سماعت آصف علی زرداری کے وکیل فاروق ایچ نائیک نے اپنے موکل کی حاضری سے استثنیٰ کی درخواست دائر کرتے ہوئے کہا کہ آصف علی زرداری کا کراچی میں علاج جاری ہے، انہیں متعدد امراض لاحق ہیں۔ عدالت نے قراردیا کہ میگا منی لانڈرنگ اور پارک لین ریفرنسز میں آئندہ سماعت پر فرد جرم پر عائد کی جائے گی، تمام ملزمان حاضری یقینی بنائیں۔ عدالت نے آصف علی زرداری، فریال تالپور، انور مجید، عبدالغنی مجید، حسین لوائی، نمر مجید، یونس قدوائی سمیت دیگر ملزمان کو نوٹس جاری کر دیئے۔نیب کے تفتیشی افسر نے بتایا کہ ضمنی ریفرنس میں 9 نئے ملزمان کو شامل کیا ہے، 5 ملزمان کا نام فہرست سے نکال دیا۔ عدالت نے پارک لین اور میگا منی لانڈرنگ ضمنی ریفرنسز کی سماعت 22 جنوری تک ملتوی کر دی۔

Leave a Reply

Your email address will not be published. Required fields are marked *