کبڈی ورلڈکپ فائنل 2020 ، پاک بھارت ٹاکرا آج ہوگا

ایم سی سی کی ٹیم پاکستان اور بھارت کے درمیان کبڈی ورلڈ کپ کا فائنل دیکھے گی

لاہور: (پاکستان فوکس آن لائن) عالمی کبڈی ورلڈکپ 2020کا فائنل آج لاہور میں روایتی حریف پاکستان اور بھارت کے درمیان کھیلا جائیگا۔
تفصیلات کے مطابق عالمی کبڈی ورلڈکپ کا فائنل پاک بھارت کے درمیان آج شام سات بجے لاہور میں ہورہا ہے ۔ جبکہ تیسری اور چوتھی پوزیشن کیلئے ایران کا مقابلہ آسٹریلیا سے لاہور میں ہی ہوگا۔ پہلےسیمی فائنل میں بھارت نے آسٹریلیا کو 32کے مقابلے میں 42پوائنٹس سے جبکہ دوسرے سیمی فائنل میں پاکستان نے ایران کو 30کے مقابلے میں 52 پوائنٹس سے شکست دی ۔ پاکستان نے ایران کے خلاف زبردست پرفارمنس دیتے ہوئے برتری ثابت کی۔ہاف ٹائم پر پاکستان کو 17 کے مقابلے میں 29 پوائنٹس کی سبقت تھی۔ پاکستان کی جانب سے کپتان عرفان مانا، شفیق چشی، ملک بن یامین، مشرف جنجوعہ، وقاص بٹ، اکمل شہزاد ڈوگر نے ٹیم کو کامیابی دلانے میں اہم کردار اداکیا۔
قبل ازیں ایک اور سیمی فائنل بھارت اور آسٹریلیا کے درمیان کھیلا گیا جس میں بھارتی کھلاڑیوں نے بہترین کھیل پیش کیا۔ ہاف ٹائم پر بھارت کو 14 کے مقابلے میں 28 پوائنٹس کی سبقت حاصل تھی۔سٹیڈیم میں موجود تماشایوں کی بڑی تعداد نے دونوں ٹیموں کو عمدہ کھیل پر بھرپور داد دی۔ دوسرے ہاف میں بھی بھارتی ٹیم نے خوب داؤپیچ لگائے اورمدِمقابل ٹیم پرغلبہ برقرار رکھا۔
یاد رہے کہ پاکستان نے عالمی مقابلے میں پانچویں بار فائنل کھیلنے کا اعزاز حاصل کیا ہے۔ فائنل جیتنے والی ٹیم کو ٹرافی کے ساتھ ایک کروڑ روپے انعام دیا جائے گا جب کہ رنر اپ کو 75 لاکھ روپے دئیے جائیں گے۔
دوسری جانب پاکستان کے دورے پر آئی مالی بورن کرکٹ کلب (ایم سی سی) کی ٹیم نے پاکستان اور بھارت کی ٹیموں کے درمیان کبڈی ورلڈ کپ کا فائنل ٹاکرا دیکھنے کی خواہش کا اظہار کیا ہے۔ایم سی سی کی ٹیم نے پاک بھارت کبڈی ٹاکرا دیکھنے کے خواہش کی جسے پی سی بی نے منظور کر لیا۔میڈیا رپورٹس کے مطابق ذرائع پی سی بی کا کہنا ہے کہ کمار سنگا کارا کی قیادت میں ایم سی سی ٹیم کبڈی ورلڈ کپ کا فائنل دیکھے گی۔پاکستان اور بھارت کی ٹیموں کے درمیان کبڈی ورلڈ کپ کا فائنل آج پنجاب اسٹیڈیم میں ہو گا۔

Leave a Reply

Your email address will not be published. Required fields are marked *