اقوام متحدہ نے پاکستان کو اپنے ملازمین کیلئے ’فیملی اسٹیشن‘ قرار دے دیا

نیوریارک: (پاکستان فوکس آن لائن) اقوام متحدہ کے غیر ملکی اہلکاروں کی فیملیز کے پاکستان میں قیام کرنے پر عائد پابندی اٹھالی گئی۔مسلح افواج کی قربانیوں اور امن کی کوششیں رنگ لانے لگی ہے،بین الاقوامی سطح پر پاکستان کے تشخص کو پذیرائی ملنے لگی ہے،اقوام متحدہ نے اپنے اہلکاروں کے لئے پاکستان کو فیملی اسٹیشن یعنی خاندان کے ہمراہ رہنے کے لیے محفوظ ملک قرار دیدیا ہے ۔
اقوام متحدہ کے ادارے انٹرنیشنل سول سروس کمیشن کی جانب سے پاکستان کو لکھے جانے والے خط میں 14 جون سے پاکستان کے لیے نان فیملی اسٹیشن پوزیشن ختم کر دی گئی ہے ۔پاکستان کو بھیجےگئے خط میں کہا گیا ہے کہ فیصلہ اقوام متحدہ کے ادارہ برائے سیفٹی و سیکیورٹی کی سفارشات کی روشنی میں کیا گیا ۔

اقوام متحدہ کے ادارہ برائے سیفٹی وسیکیورٹی نے پاکستان میں امن وامان کی صورتحال کا جائزہ لے کر اپنی سفارشات پیش کیں۔ان سفارشات کے بعد اقوام متحدہ کے غیر ملکی اہلکار اب اپنے خاندان کے ہمراہ پاکستان میں قیام کر سکتے ہیں ۔اس سے پہلے نائن الیون کے بعد پاکستان میں اپنی فضائی سروس بند کرنے والی برٹش ائرویز نے بھی گزشتہ ماہ پاکستان کے لئے پروازیں دوبارہ بحال کی تھیں ۔
اقوام متحدہ میں پاکستان کی مستقل مندوب ملیحہ لودھی نے اس حوالے سے اقوام متحدہ کے فیصلے کو خوش آئند قرار دیا اور کہا کہ یہ ایک مثبت عمل ہے جس کے لیے ہم سب نے ساتھ کام کیا ہے۔

وزیر خارجہ شاہ محمود قریشی نے بھی اس فیصلے کا خیر مقدم کیا اور کہا کہ یہ ایک اچھی خبر ہے جس کی بنیاد جامع سیکیورٹی پر غور و غوض ہے۔

Leave a Reply

Your email address will not be published. Required fields are marked *