مردوں کے کرکٹ میچ میں امپائرنگ کرنیوالی پہلی خاتون

سڈنی: (پاکستان فوکس آن لائن) آسٹریلیا کی خاتون امپائر کلیئر اینتونی پولوسک پہلی مرتبہ مینز ون ڈے انٹرنیشنل کرکٹ میچ کی امپائرنگ کرنے والی پہلی خاتون امپائر کا اعزاز حاصل کریں گی۔آئی سی سی کے مطابق کلیئر پولوسک نمیبیا میں منعقد ورلڈ کرکٹ لیگ ڈویژن 2 کے فائنل میں فیلڈ امپائر کی خدمات انجام دیں گی جس میں عمان اور نمیبیا کی ٹیمیں آمنے سامنے ہوں گی۔پولوسک کا مین او ڈی آئی میں امپائرنگ پر کہنا تھا کہ ’مجھے بہت خوشی ہے کہ میں مین او ڈی آئی کی پہلی خاتون امپائر ہوں گی‘۔انہوں نے کہا ایسی کوئی وجہ نہیں کہ خواتین کرکٹ میں امپائر نہیں بن سکتیں بلکہ یہ بہت اہم ہے کہ خواتین امپائرز کو مواقع فراہم کیے جائیں تاکہ صنفی تفریق ختم ہو اور دیگر خواتین کو آگے آنے کا موقع ملے۔

کلیئر پولوسک کا کہنا تھا کہ میرا امپائر بننا پوری ٹیم کی محنت ہے جس کے لیے میں ان تمام امپائرز کا شکریہ ادا کرنا چاہوں گی جن کے ساتھ میں نے کام کیا اس کے علاوہ مقامی کرکٹ ایسوسی ایشن، این ایس کرکٹ امپائرز اور اسکوررز ، آسٹریلوی کرکٹ ایسوسی ایشن سمیت دوستوں اور اہل خانہ کا شکریہ ادا کرتی ہوں جنہوں نے میرا ساتھ دیا۔کلیئر پولوسک نے امپائرنگ کی ذمہ داریاں 2017 سے انجام دینا شروع کیں، انہوں نے سب سے پہلے ویمن ٹی ٹوئنٹی انٹرنیشنل کرکٹ کی امپائرنگ کی۔2018 میں انہوں نے پہلی مرتبہ انگلینڈ میں کرکٹ ٹیم کے افتتاحی میچ میں فیلڈ امپائرنگ کی جس میں انگلینڈ اور آسٹریلیا مد مقابل تھے۔

Leave a Reply

Your email address will not be published. Required fields are marked *