مسجد نبوی ﷺ کو عام نمازیوں کیلئے کھولنے کی اجازت

اتوار 31 مئی سے مسجد نبویﷺ نمازیوں کیلئے کھول دی جائے گی

ریاض: (پاکستان فوکس آن لائن)سعودی حکومت نے کل سے مسجد نبوی کھولنے کا اعلان کر دیا، عام شہری نماز ادا کرسکیں گے۔ سعودی حکومت کا بڑا فیصلہ سامنے آیا ہے، تمام تر احتیاطی تدابیر کے ساتھ مسجد نبوی ﷺ کھولنے کے احکامات جاری کئے گئے ہیں، عام شہری مسجد میں پھر سے نماز ادا کرسکیں گے، کورونا وبا کے باعث مسجد نبوی کو عام نمازیوں کے لیے بند کیا گیا تھا۔
تفصیلات کے مطابق خادم الحرمین الشریفین شاہ سلمان بن عبدالعزیز نے کورونا لاک ڈاؤن کے باعث گزشتہ دو ماہ سے بند مسجد بنوی ﷺ کو عام نمازیوں کے لیے کھولنے کی اجازت دیدی۔سعودی میڈیا کے مطابق مسجد نبوی ﷺ میں 31 مئی سے عام نمازیوں کے داخلے کی اجازت ہوگی اور خادمین الحرمین الشریفین نے اس فیصلے کی منظوری بھی دیدی ہے۔سعودی حکام کے مطابق احتیاطی تدابیرکے ساتھ مسجد نبوی ﷺ کو عام نمازیوں کے لیے کھولنے کے احکامات دئیے گئے ہیں۔
میڈیا رپورٹس کے مطابق مسجد نبوی ﷺ میں 40 فیصد نمازیوں کو ابتدائی دنوں میں داخلے کی اجازت ہو گی اور حکام کی جانب سے مسجد نبوی ﷺ میں کھلے فرش پر نماز ادا کرنے کی ہدایت کی گئی ہے۔خیال رہے کہ کورونا وائرس کے پھیلاؤ کے خدشے کے پیش نظر سعودی حکومت نے پورے ملک میں لاک ڈاؤن کرتے ہوئے خانہ کعبہ اور مسجد نبوی ﷺ سمیت تمام مساجد میں باجماعت نمازوں کی ادائیگی اور نمازیوں کے داخلے پر پابندی عائد دی تھی۔اب سعودی حکومت نے 31 مئی سے لاک ڈاؤن میں نرمی کا اعلان کرتے ہوئے احتیاطی تدابیر کے ساتھ دفاتر کھولنے کی اجازت دی ہے جب کہ سعودی حکومت نے ملک بھر کی 90 ہزار مساجد میں جراثیم کش اسپرے بھی کروائے ہیں۔وزارت مذہبی امور نے بزرگ شہریوں، بیمار افراد اور 15 سال سے کم عمر کے بچوں کو گھروں میں ہی نماز پڑھنے کی تاکید کی ہے۔

Leave a Reply

Your email address will not be published. Required fields are marked *