مولانا فضل الرحمان کی ڈیڈ لائن کا آخری روز، اگلے لائحہ عمل کیلئے پارٹی اجلاس جاری

اسلام آباد: (پاکستان فوکس آن لائن)فضل الرحمن کی ڈیڈ لائن کا آج آخری روز، رہبر کمیٹی نے ڈی چوک تک جانے کی تجویز دے دی۔ دھرنے کے شرکا کی پشاور موڑ سے منتقلی کا فیصلہ آج ہو گا۔ حکومت نے معاہدے کی خلاف ورزی پر قانون حرکت میں آنے کی وارننگ دے رکھی ہے۔
اپنے مطالبات کی منظوری کے لیے مولانا فضل الرحمان کی حکومت کو دی گئی ڈیڈ لائن کا آج آخری روز ہے اور انہوں نے اگلے لائحہ عمل کی تیاری کے لیے پارٹی کا اہم اجلاس جاری ہے۔
اسلام آباد میں جمعیت علمائے اسلام (ف) کے آزادی مارچ کے شرکا چوتھے روز بھی موجود ہیں۔ مارچ میں شریف جے یو آئی (ف) کے کارکنوں کا جوش و ولولہ تاحال جوان ہے۔ نمازِ فجر کے بعد سے آزادی مارچ کے شرکاء مختلف سرگرمیوں میں مشغول ہیں، ایک جانب کارکنوں کی بڑی تعداد نے اپنی مدد آپ کے پنڈال کی صفائی کی تو دوسری جانب کارکن کھیل تماشوں میں بھی مصروف رہے۔ کہیں کارکن فٹبال کھیلتے دیکھے گئے تو کہیں چادر کی مدد سے اپنے ساتھی کو فضا میں اچھالتے نظر آئے۔

دوسری جانب مولانا فضل الرحمان کی سربراہی میں پارٹی کا اہم اجلاس جاری ہے جس میں مرکزی شوری ارکان اور صوبوں کے امیر شریک ہیں، اجلاس میں حکومت کو دی گئی ڈیڈ لائن کے بعد اگلی حکمت عملی پر حتمی مشاورت ہورہی ہے، اجلاس کے فیصلوں کا اعلان مولانا فضل الرحمان پنڈال میں کریں گے۔
پولیس و رینجرز کا فلیگ مارچ
اسلام آباد میں امن و امان کی صورت حال برقرار رکھنے کے لئے پولیس اور رینجرز کی جانب سے فلیگ مارچ کیا گیا۔ اس حوالے سے ترجمان اسلام آباد پولیس نے کہا ہے کہ اسلام آباد پولیس ہر قسم کی ہنگامی صورتحال سے نمٹنے کے لئے تیار ہے، پولیس ہائی الرٹ اور افسران و جوانوں کا مورال بلند ہے، شہریوں کی جان و مال کے تحفظ کے لیے ضروری اقدامات اٹھائے جا رہے ہیں، مختلف مقامات پرپولیس کی بھاری نفری تعینات کردی گئی ہے،کسی بھی شخص کو قانون ہاتھ میں لینے کی ہرگز اجازت نہیں دی جائے گی۔

Leave a Reply

Your email address will not be published. Required fields are marked *