لاہور ہائیکورٹ کا پلازمہ فروخت کرنے والوں کے خلاف کارروائی کا حکم

لاہور: (پاکستان فوکس آن لائن)کورونا کے مریضوں کا پلازمہ فروخت کرنے کے خلاف درخواست پر سماعت کرتے ہوئے چیف جسٹس لاہور ہائیکورٹ نے پلازمہ فروخت کرنے والوں کے خلاف کارروائی کا حکم دے دیا۔لاہور ہائیکورٹ میں کورونا مریضوں کا پلازمہ فروخت کیخلاف درخواست کی سماعت ہوئی۔ سیکریٹری صحت نے مریضوں کی جانب سے پلازمہ فروخت کرنے کا اعتراف کیا۔ چیف جسٹس ہائیکورٹ نے کہا آج کل سوشل میڈیا پر 2 جملے بہت مقبول ہیں، سرکاری ہسپتال میں جان، پرائیویٹ ہسپتال میں مال نہیں بچتا، سرکاری افسر بیان حلفی کیساتھ جواب جمع کرائے گا، سرکاری افسر کا جھوٹ ثابت ہو تو فوری سزا ملے گی۔
چیف جسٹس قاسم خان نے کہا ایک کمرے کا رات کا کرایہ 60 ہزار روپے ہے۔ جس پر ہیلتھ افسر نے عدالت کو بتایا کہ آئی سی یو کے بیڈ کا کرایہ سرکاری طور پر 50 ہزار بنتا ہے، اضافی چارجز پر 4 ہسپتالوں کے خلاف کارروائی کی۔ چیف جسٹس قاسم خان نے کہا فروری سے کورونا پھیلا، مارچ میں لاک ڈاؤن ہوگیا، اتنا وقت گزر گیا لیکن حکومت نے کچھ نہیں کیا۔سیکریٹری صحت نے کہا مریضوں کا علاج 20 روز قبل پرائیویٹ ہسپتالوں میں شروع کیا گیا۔ چیف جسٹس ہائیکورٹ قاسم خان نے کہا مجھے مت بتائیں، میں بھی اسی معاشرے کا حصہ ہوں، کیا آپ لاہور میں بیٹھ کر پنجاب کو چلا سکتے ہیں؟۔جس پرچیف جسٹس نے پلازمہ فروخت کرنے والوں کے خلاف کارروائی کا حکم دے دیا اور ریمارکس دیے کہ پلازمہ فروخت کرنے والوں کو پکڑ کر کارروائی کریں۔

Leave a Reply

Your email address will not be published. Required fields are marked *