ورلڈ کپ اور ایشیا کپ ملتوی لیکن بھارت آئی پی ایل کرانے کیلئے بے تاب

کورونا وائرس کے باعث ٹی ٹوئنٹی ورلڈ کپ اور ایشیا کپ ملتوی کردیے گئے لیکن بھارتی بورڈ رواں برس ہی انڈین پریمیئر لیگ (آئی پی ایل) کرانے کے لیے بے تاب ہے۔دنیا بھر میں کورونا وائرس کا خوف پھیلا ہوا ہے اور ایسے میں کھیلوں کے بڑے ایونٹ منسوخ یا ملتوی کردیے گئے ہیں جب کہ کورونا کے باعث پی ایس ایل بھی مکمل نہ ہوسکی اور رواں برس آسٹریلیا میں ہونے والا ٹی ٹوئنٹی ورلڈ کپ بھی ملتوی ہوگیا۔لیکن بھارتی بورڈ آئی پی ایل کرانے کے لیے بے تاب ہے۔بھارتی میڈیا کے مطابق آئی پی ایل 2020کی تاریخوں کو فائنل کرلیا گیا ہے اور اس بار ایونٹ بھارت کے بجائے متحدہ عرب امارات میں کھیلا جائے گا۔چیئر مین آئی پی ایل برجیش پٹیل کا کہنا ہے کہ ایونٹ کا آغاز 19 ستمبر کو متحدہ عرب امارات میں ہوگا جب کہ فائنل 8 نومبر کو کھیلا جائے گا۔ انہوں نے کہا کہ ٹورنامنٹ کے لیے دبئی، ابوظبی اور شارجہ اہم وینیوز ہیں جہاں میچز کھیلے جائیں گے۔ جنوبی افریقا سمیت کئی ممالک کے کرکٹرز بھی آئی پی ایل کھیلنے کو تیار ہیں تاہم سوال یہ ہے کہ کورونا وائرس کے خطرات کے پیش نظر اگر ٹی ٹوئنٹی ورلڈ کپ ملتوی ہوسکتا ہے تو آئی پی ایل کیوں نہیں؟
دوسری جانب سابق اسپنرعبد الرحمان کانجی ٹی وی سے گفتگو کرتے ہوئے کہنا تھا کہ ٹی ٹونٹی ورلڈ کپ کو کورونا وائرس کی وجہ سے ملتوی کیا گیا لیکن میرے لیے بہت حیران کن ہے کہ آئی پی ایل میں شرکت کے لیے سب راضی ہیں ،کیا آئی پی ایل کو کورونا فری قرار دیا جا چکا ہے ؟ آئی سی سی کو مداخلت کرنی چاہیے پیسے پر کھلاڑیوں کی صحت کو ترجیح دینا سراسر غلط ہے۔ جبکہ پاکستان کرکٹ بورڈ کورونا وائرس کے سبب پی ایس ایل فائیو کے ملتوی ہونے والے میچزکی تاریخوں کا فیصلہ نہ کر سکا ترجمان پی سی بی کا کہنا ہے کہ صورتحال کا جائزہ لے رہے ہیں اولین ترجیح یہی ہے کہ ملتوی شدہ چاروں میچز نومبرمیں کروائے جائیں۔

Leave a Reply

Your email address will not be published. Required fields are marked *