فن لینڈ کی ثانا میرن دنیا کی کم عمر ترین وزیراعظم منتخب

فن لینڈ میں نومنتخب وزیراعظم 34 سالہ ثانا میرن نے دنیا کی کم عمر ترین وزیراعظم ہونے کا اعزاز بھی حاصل کرلیا ہے۔
بین الاقوامی خبر رساں ادارے کے مطابق فن لینڈ میں وزیراعظم آنتی رائے کے مستعفی ہونے کے بعد حکمراں جماعت سوشل ڈیموکریٹک پارٹی نے کابینہ کی رکن ثانا میرن کو وزیر اعظم نامزد کردیا ہے، اتحادی جماعتوں کی حمایت کے بعد ان کا انتخاب عمل میں آگیا ہے اور اس ہفتے اپنے عہدے کا حلف اُٹھا لیں گی۔
34 سالہ ثانا میرن اگر عہدے کا حلف اُٹھالیتی ہیں تو وہ دنیا کی سب سے کم عمر وزیراعظم بن جائیں گی اور اپنے وطن کی وہ تیسری خاتون وزیراعظم ہوں گی۔ اس وقت دنیا کی سب کم عمر خاتون وزیراعظم کا اعزاز نیوزی لینڈ کی وزیراعظم جیسِنڈا آرڈرن (39 سال) اور مردوں میں یوکرین کے وزیرِ اعظم اولیکسی ہونچاروک (35 سال) کے پاس ہے۔
ثانا میرن اس سے قبل وزیر ٹرانسپورٹ کی ذمہ داریاں نبھا رہی تھیں، اپریل میں ہونے والے انتخابات میں ثانا میرن کی پارٹی سب سے بڑی جماعت ثابت ہوئی تھی تاہم حکومت میں 4 اتحادی جماعتوں کو شامل کیا گیا تھا اس طرح کابینہ پانچ جماعتی اتحاد پر مشتمل ہے اور دلچسپ بات یہ ہے کہ ان پانچوں جماعتوں کی سربراہاں خواتین ہی ہیں۔
قبل ازیں سابق وزیراعظم آنتی رائے کو ملک میں ہونے والی ڈاک ہڑتال پر قابو پالینے کے طریقہ کار پر پانچ میں سے ایک اتحادی جماعت کا اعتماد کھو دیا تھا جس کے باعث انہیں اپنے عہدے سے سبکدوش ہونا پڑا تھا۔

Leave a Reply

Your email address will not be published. Required fields are marked *