دورہ انگلینڈ کیلئے پاکستانی اسکواڈ کا اعلان، سرفراز احمد کی قومی ٹیم میں واپسی

لاہور: (پاکستان فوکس آن لائن)انگلینڈ کے خلاف ٹیسٹ اور ٹی ٹوئنٹی سیریز کے لیے قومی کرکٹرز کے وسیع اسکواڈ کا انتخاب کیا گیا ہے جس میں سابق کپتان سرفراز احمد کی بھی ٹیم میں واپسی ہوئی ہے۔دورہ انگلینڈ کے لیے پاکستان کے 29 رکنی اسکواڈ کا اعلان کیا گیا ہے جس میں سینٹرل کنٹریکٹ اور ایمرجنگ کیٹگری کے 20 کھلاڑی شامل ہیں۔دورہ انگلینڈ کے دوران ٹیسٹ سیریز کی کپتانی اظہر علی کریں گے جب کہ ون ڈے اور ٹی ٹوئنٹی ٹیم کے کپتان بابر اعظم ہوں گے۔دورے کے لیے ہیڈ کوچ مصباح الحق کے علاوہ بیٹنگ کوچ یونس خان اور اسپن بولنگ کوچ مشتاق احمد ہوں گے جب کہ عبدالمجید کو گرانٹ بریڈ برن کی جگہ فیلڈنگ کوچ مقرر کیا گیا ہے۔ انگلینڈ کے خلاف 14 رکنی ٹیم مینجمنٹ کا اعلان بھی کیا گیا ہے جس میں سرفراز احمد کی واپسی ہوئی ہے۔14 رکنی ٹیم میں فواد عالم، شعیب ملک، محمد حفیظ، وہاب ریاض، عابد علی، فخر زمان، شان مسعود، امام الحق، اسد شفیق، خوشدل شاہ، فہیم اشرف، عمران خان اور کاشف بھٹی بھی شامل ہیں۔
ان کے علاوہ افتخار احمد، محمد رضوان، حارث رؤف اور محمد عباس بھی اسکواڈ کا حصہ ہیں جب کہ پاکستان انڈر 19 کے حیدر علی بھی اسکواڈ میں شامل ہیں۔اسکواڈ میں چار ریزرو کھلاڑیوں کو بھی شامل کیا گیا ہے جس میں بلال آصف، محمد نواز، محمد موسیٰ اور عمران بٹ شامل ہیں۔حارث سہیل کورونا وائرس کی وبا کے پیش نظر سیریز سے دستبردار ہو چکے ہیں جب کہ فاسٹ بولر محمد عامر نے نجی مصروفیت کے باعث انگلینڈ نہ جانے کا فیصلہ کیا ہے۔انگلینڈ روانگی سے قبل کرکٹرز کے کووڈ 19 کے ٹیسٹ 20 اور 25 جون کو ہوں گے۔
اس موقع پر قومی کرکٹ ٹیم کے ہیڈ کوچ اور چیف سلیکٹر مصباح الحق کا کہنا تھا کہ کرکٹرز کے یونس خان اور مشتاق احمد کے تجربے سے مستفید ہونے کا خواہاں ہوں۔انہوں نے کہا کہ کھلاڑیوں کا انتخاب مستقبل کو پیش نظر رکھ کر کیا گیا ہے، کھلاڑیوں کی میدان سے دوری ایک چیلنج ہے،مصباح الحق کا کہنا تھا کہ اسکواڈ کے انتخاب کے دوران سلیکٹرز کی ترجیح طویل طرز کی کرکٹ رہی، پاکستان کو آئندہ 2 ماہ ٹیسٹ کرکٹ کھیلنی ہے۔

Leave a Reply

Your email address will not be published. Required fields are marked *