نئی دہلی میں 200 یونٹ تک استعمال کرنے والوں کیلئے بجلی مفت

نئی دہلی: (پاکستان فوکس آن لائن)نئی دہلی کے وزیر اعلیٰ اروند کیجریوال نے 200 یونٹ تک استعمال کرنے والوں کے لیے بجلی مفت کرنے کا اعلان کر دیا۔
این ڈی ٹی وی کی رپورٹ کے مطابق اروند کیجریوال نے پریس کانفرنس کے دوران کہا کہ ‘201 سے 400 یونٹ تک استعمال کرنے والوں کو نصف قیمت ادا کرنی ہوگی کیونکہ دہلی حکومت انہیں 50 فیصد سبسڈی فراہم کرے گی۔
انہوں نے اس فیصلے کو ‘عام آدمی کے لیے ‘تاریخی فیصلہ قرار دیتے ہوئے کہا کہ ‘آج ملک میں سب سے سستی بجلی دہلی میں ہے۔ فری لائف لائن بجلی اسکیم کے تحت 200 تک بجلی استعمال کرنے والے صارفین کو کوئی بل ادا نہیں کرنا پڑے گا۔ان کا کہنا تھا کہ ‘اگر وی آئی پی شخصیات اور بڑے سیاستدانوں کو مفت بجلی ملنے پر کوئی کچھ نہیں کہتا، تو عام آدمی کیوں محروم رہے؟ کیا میں نے یہ قدم اٹھا کر غلط کیا؟
اروند کیجریوال کا کہنا تھا کہ ‘اس اسکیم سے دارالحکومت کے 33 فیصد صارفین کو فائدہ ہوگا جو گرمی میں 200 یونٹ سے کم بجلی استعمال کرتے ہیں جبکہ سردیوں میں تقریباً 70 فیصد افراد کا بجلی کا استعمال 200 یونٹ سے کم ہوجاتا ہے۔
نئی دہلی کے وزیر اعلیٰ کے نائب مَنیش سِسوڈیا نے ٹوئٹ کرتے ہوئے کہا کہ ‘اچھی تعلیم اور صحت کی سہولیات کی طرح گھروں میں لائٹ اور پنکھے چلانے جتنی بجلی بھی عوام کے لیے ضروری ہے۔
دوسری جانب بھارتیہ جنتا پارٹی (بی جے پی) نے اس اعلان کو الیکشن اسٹریٹیجی قرار دیا۔سربراہ بی جے پی دہلی مَنوج تیواری نے کہا کہ ‘یہ اروند کیجریوال کی پارٹی کا فیصلہ نہیں ہے بلکہ یہ بی جے پی کی جدوجہد کا نتیجہ ہے۔انہوں نے کہا کہ ‘ہم اسے دو زاویوں سے دیکھ سکتے ہیں، یہ انتخابات سے قبل عوام کو متوجہ کرنے کی اسٹریٹیجی ہے، انہوں نے دہلی کے عوام سے 7 ہزار کروڑ لوٹے، عوام کو وہ یہ پیسے کب واپس کر رہے ہیں؟

Leave a Reply

Your email address will not be published. Required fields are marked *