جعلی اکاؤنٹس کیس: آصف زرداری 19 اگست تک جوڈیشل ریمانڈ پر جیل منتقل

اسلام آباد: (پاکستان فوکس آن لائن) احتساب عدالت نے آصف زرداری کو جوڈیشل ریمانڈ پر جیل بھیجتے ہوئے 19 اگست کو دوبارہ پیش کرنے کا حکم دیا۔احتساب عدالت اسلام آباد کے جج محمد بشیر نے جعلی اکاؤنٹس کیس کی سماعت کی۔ نیب ٹیم نے سابق صدر آصف علی زرداری کو عدالت میں پیش کیا۔نیب پراسیکیوٹر نے بتایا کہ کیس میں ایک نئی پیش رفت ہوگئی ہے، ایک ملزم نے بیان دیا ہے کہ اس کو آصف زرداری سے کنفرنٹ کرانا ہے، لہٰذا آصف زرداری کا مزید جسمانی ریمانڈ دیا جائے۔

نہ بیٹی کو ملنے دیا گیا نہ عید کی نماز پڑھنے دی گئی

آصف زرداری روسٹرم پر آگئے اور کہا کہ عید کی نماز بھی نہیں پڑھنے دیتے، عرفان منگی یہاں ہو تو پوچھوں کہ یہ کون سی اسلامی ریاست ہے، عدالت کی اجازت کے باوجود میری بیٹی کو مجھ سے ملنے نہیں دیا جاتا۔آصف زرداری کی ہمشیرہ فریال تالپور نے سندھ اسمبلی کے اجلاس میں شرکت کے لیے راہداری ریمانڈ کی درخواست دائر کردی۔ اس پر عدالت نے نیب پراسکیوٹر سے جواب طلب کرلیا۔سابق صدر آصف زرداری نے جیل میں سہولیات کے لیے اے کلاس کی درخواست دائر کرتے ہوئے کہا کہ میڈیکل سہولیات اوراہل خانہ سے ملاقات کی اجازت بھی دی جائے۔احتساب عدالت نے آصف زرداری کو جوڈیشل ریمانڈ پر جیل بھیجتے ہوئے 19 اگست کو دوبارہ پیش کرنے کا حکم دیا۔

Leave a Reply

Your email address will not be published. Required fields are marked *