افغانستان سے امریکی فوج کا انخلا قریب، ٹرمپ نے تیاری کا اشارہ دےدیا

واشنگٹن: (پاکستان فوکس آن لائن)امریکا، افغانستان میں طالبان کے ساتھ امن معاہدے کے قریب پہنچ گیا جہاں امریکا کے صدر ڈونلڈ ٹرمپ نے معاہدے کی تیاری کا اشارہ دے دیا۔
بین الاقوامی خبررساں ادارے کے مطابق امریکا کی اعلیٰ سیاسی و عسکری قیادت نے امریکی صدر ڈونلڈ ٹرمپ سے ملاقات کی جس میں افغانستان سے امریکی فوج کے انخلا اور طالبان کے ساتھ امن معاہدے پر غور کیا گیا۔امریکی نائب صدر مائیک پینس، وزیر خا رجہ مائیک پومپیو، وزیر دفاع مارک ایسپر، میرین جنرل، چئیرمین آف دی جوائنٹ چیفس آف اسٹاف جنرل جوزف ڈنفورڈ، قومی سلامتی کے مشیر جان بولٹن اور خصوصی نمائندہ برائے افغانستان زلمے خلیل زاد نے امریکی صدر ڈونلڈ ٹرمپ سے ملاقات کی۔
ترجمان وائٹ ہاؤس کا کہنا ہے کہ ڈونلڈ ٹرمپ سے ان کے اعلیٰ مشیروں کی بات چیت بہت اچھی رہی۔غیر ملکی خبر ایجنسی کے مطابق وائٹ ہاوس نے طالبان کے ساتھ امن معاہدےکی تیاری کا اشارہ دے دیا ہے۔خبر ایجنسی کے مطابق زلمےخلیل زاد طالبان سے امن معاہدےکو حتمی شکل دینے کے لیے رواں ہفتے قطر جائیں گے، معاہدے سے افغان حکومت، طالبان اور دیگر فریقین کے درمیان بات چیت کی راہ ہموار ہوئی ہے۔
یاد رہے کہ گزشتہ روز امریکی صدر ڈونلڈ ٹرمپ اور وزیراعظم عمران خان کے درمیان ٹیلی فونک رابطہ ہوا تھا جس میں مقبوضہ کشمیر اور افغانستان کے معاملات پر بات چیت کی گئی۔چند روز قبل زلمے خلیل زاد نے بھی اپنے بیان میں کہا تھا کہ طالبان کے ساتھ ایسا امن معاہدہ چاہتے ہیں جس سے فوجی انخلا ممکن ہو سکے۔

Leave a Reply

Your email address will not be published. Required fields are marked *