نریندر مودی یا راہول گاندھی، وزارت عظمیٰ کا سہرا کس کے سر سجے گا

بھارت:لوک سبھا انتخابات کے پہلے مرحلے کیلئے پولنگ کل ہوگی

نئی دہلی: (پاکستان فوکس آن لائن)بھارت میں لوک سبھاکے انتخابات کا پہلا مرحلہ کل سے شروع ہورہاہے۔ بھارتی لوک سبھا کے انتخابات میں نوے کروڑ ووٹر حق رائے دہی استعمال کریں گے ۔ لوک سبھا کی پانچ سو تینتالیس نشستوں کیلئے انتخابات سات مرحلوں میں مکمل ہوں گے۔انتخابات کے حتمی نتائج کا اعلان بھارتی الیکشن کمیشن کی طرف سے تئیس مئی کو سنایا جائے گا۔ بھارتی لوک سبھا یعنی وہاں کی قومی اسمبلی کے انتخابات کا پہلا مرحلہ آن پہنچاہے۔ بی جے پی ، کانگریس ، سماج وادی پارٹی ، جنتا دلاور دیگر چھوٹی بڑی پارٹیوں کا کڑا امتحان شروع ہونے کے قریب ہے۔ دنیا کی سب سے بڑی جمہوریت کے انتخابات کے پہلے مرحلے میں بھارت کی 20 ریاستوں اور مرکز کے 91 حلقوں میں عوام اپنے نمائندوں کا انتخاب کریں گے۔ بھارتی ریاست اترپردیش میں بسنے والے لوگوں کی تعداد پاکستان کی کل آبادی سے بھی زیادہ ہے۔ یہاں بسنے والوں کی تعداد کے لحاظ سے دنیا کے کئی ممالک اترپردیش سے پیچھے ہیں۔ سب سے ذیادہ آبادی والی ریاست اترپریش کی لوک سبھا میں 80 نشستیں ہیں۔ اس کے مقابلے میں مغربی بنگال اور بہار کی چالیس ، چالیس نشستیں ہیں۔ اتر پردیش، بہار اور مغربی بنگال کی ریاستوں میں سات مرحلوں میں انتخابات مکمل ہوں گے۔پہلے مرحلےمیں اتر پردیش کے آٹھ ، بہار میں چار اور مغربی بنگال کے دو حلقوں میں ووٹ ڈالیں جائیں گے ۔مقبوضہ کشمیر میں لوک سبھا کی چھ نشستوں کیلیےبھی ووٹ ڈالے جائیں گے۔پہلے مرحلے میں جموں اور بارہ مولا کی نشستوں کے لیے ووٹنگ ہوگی۔ چھ ہفتوں تک جاری رہنے والے انتخابات کی ووٹنگ کے لیے ملک بھر میں دس لاکھ پولنگ بوتھ قائم کیے گئے ہیں۔ بھارتی حکومت کی طرف سے انتخابات کی سیکیورٹی کے لیے ایک کروڑ اہلکار تعینات کیے گئے ہیں۔ بھارتی انتخابات میں 90 کروڑ افراد ووٹ ڈالنے کے اہل ہیں جو امریکہ اور یورپی یونین کی مجموعی آبادی سے بھی زیادہ ہے۔ بھارتی میڈیا کے مطابق بھارتی انتخابات میں امریکی انتخابات سے چھ اعشاریہ پانچ ارب ڈالرز زیادہ لاگت آئے گی۔ بھارت کے 2014 میں عام انتخابات کے برعکس مودی سرکار کو شدید مشکلات کا سامنا ہے۔ بی جے پی کو حال ہی میں اپنے مضبوط علاقوں راجھستان اور چھتیس گڑھ میں شکست کا سامنا کرنا پڑا تھا۔ دوسری جانب کانگریس گزشتہ انتخابات کا حساب برابر کرنے کے لیے سیاسی میدان میں سر دھڑ کی بازی لگا رہی ہے۔ دیکھنا یہ ہے کہ 2014 الیکشن میں چوالیس نشستیں لینے والی کانگریس دو سو بیاسی نشستیں لینے والی بی جے پی کو پچھاڑ سکے گی؟یاد رہے بھارتی چیف الیکشن کمشنر سنیل اروڑا نے سات مرحلوں میں ہونے والے عام انتخابات کی تاریخ کااعلان مارچ کے دوسرے ہفتے میں کیا تھا۔بھارت میں انتخابات کےپہلے مرحلے کی پولنگ 11 اپریل اور گنتی 23 مئی کو ہوگی۔ دوسرامرحلہ 18 اورتیسرا 23 اپریل کوہوگا۔ بھارتی انتخابات کاچوتھا مرحلہ 29 اپریل اورپانچواں 6 مئی کوہوگا۔چھٹا مرحلہ 12مئی جبکہ ساتواں مرحلہ 19مئی کو ہوگا۔انتخابات میں90 کروڑووٹرز حق رائے دہی کا استعمال کریں گے، جن میں سے8 کروڑ 40 لاکھ ووٹرز پہلی بار ووٹ ڈالیں گے۔کس کی ہو گی جیت اور کس کی ہو گی ہار ؟؟ اس کا فیصلہ تئیس مئی کو سنایا جائے گا۔

Leave a Reply

Your email address will not be published. Required fields are marked *