وفاقی کابینہ کا بیرون ملک پاکستانیوں کیلئے انٹرنیشنل فلائٹس بحال کرنے کا فیصلہ

پٹرولیم مصنوعات کی مصنوعی قلت کسی صورت قبول نہیں، وزیراعظم عمران خان

اسلام آباد: (پاکستان فوکس آن لائن) وفاقی کابینہ نے بیرون ملک پاکستانیوں کیلئے بین الاقوامی فلائٹس بحال کرنے کا فیصلہ کیا ہے۔وزیراعظم عمران خان کی زیر صدارت وفاقی کابینہ کا اجلاس ہوا جس میں بیرون ملک (اوورسیز) پاکستانیوں کے لئے مرحلہ وار انٹرنیشنل فلائٹس بحال کرنے کا فیصلہ کیا گیا۔
وزیراعظم عمران خان نے متعلقہ حکام کو ایکشن پلان تیار کرنے کی ہدایت کرتے ہوئے کہا کہ اوورسیز پاکستانیوں کو مشکل وقت میں تنہا نہیں چھوڑیں گے، کورونا وباء کے باعث لاکھوں پاکستانی روزگار سے محروم ہوئے جس کا دکھ ہے، حکومت پاکستان اپنے ہم وطن بہن بھائیوں کی ہر ممکن مدد کیلئے تیار ہے۔میڈیارپورٹس کے مطابق ابتدائی طور پر عرب ممالک کے لئے بین الاقوامی پروازیں بحال کرنے کا فیصلہ کیا گیا ہے جہاں سے پاکستانیوں کی محفوظ وطن واپسی کے بعد اگلہ مرحلہ شروع ہوگا، سب سے پہلے بے روزگار ہونے والے مزدور اور محنت کشوں کو وطن واپس لایا جائے گا۔
اجلاس میں کورونا مریضوں کی ضرورت کی ادویات اور انجیکشنزکی زائد قیمتوں وصولی پر بحث ہوئی اور پیٹرول کی قلت پر بھی گفتگو کی گئی۔وزیراعظم کے معاون خصوصی پٹرولیم ندیم بابر نے بتایا کہ پٹرول پمپس نے پیٹرول ذخیرہ کیا ہوا ہے جس پر کئی آئل کمپنیوں اور پیٹرول پمپس کے خلاف کارروائیاں کی ہیں۔ شاہ محمود قریشی نے کہا کہ وزارت پٹرولیم بحران کی ذمہ داری قبول کرے اور فوری طور پر ذمہ داروں کا تعین کر کے کارروائی کی جائے۔
وزیراعظم عمران خان نے پٹرولیم مصنوعات کی مصنوعی قلت کا سخت نوٹس لیتے ہوئے حکم دیا ہے کہ عوام کو ریلیف کی فراہمی کے لیے اقدامات کیے جائیں۔دونوں حکام کی جانب سے پٹرول بحران پر قابو پانے کیلئے اقدامات اور جرمانوں سے متعلق رپورٹ بھی پیش کی گئی۔ وزیراعظم کو بریفنگ کے دوران بتایا گیا کہ کمپنیوں نے پٹرول ذخیرہ کیا ہوا تھا۔ اس سلسلے میں ٹیموں نے کئی چھاپے مارے ہیں، جس کے بعد ملک کے بیشتر علاقوں میں پٹرول اب دستیاب ہے۔اس موقع پر وزیراعظم عمران خان نے سخت نوٹس لیتے ہوئے واضح کیا کہ پٹرول کی مصنوعی قلت کسی صورت قبول نہیں ہے۔ عوام کو ریلیف فراہمی کے ساتھ حقائق سے آگاہ کیا جائے۔

Leave a Reply

Your email address will not be published. Required fields are marked *